Archives quotidiennes: 2 octobre 2018

Namoaka fanambarana ny fiarahamonimpirenena misehatra amin’ny fiarovana ny tontolo iainana sy ny harempirenena manoloana ny fisian’ny fifanarahana hitrandrahan’ny sambo sinoa miisa 330 eto amin’ny fari-dranomasina malagasy. Fanambarana izay tsy mankasitraka izany ary milaza fa tandidomin-doza ny toekarena an-dranomasina eto Madagasikara. Takiana ihany koa ny hamoahana ny antsipirihan’ity fifanrahana ity.

Loharanom-baovao azo antoka no nahalalana fa miady mafy hamoahana ny kaontenera miisa 60, izay an’ny orinasa TIKO sy MAGRO giazana ao amin’ny biraon’ny doany ao Toamasina ankehitriny ny mpanolontsaina manokan’ny Filoha teo aloha RAJAONARIMAMPIANINA Hery, izay malaza amin’ny famoahana entana eny amin’ny seranan-tsambon’i Toamasina.

Fotoana vitsy tsy ahataperan'ny fe-potoam-piasan'ny fitondrana HVM vao tonga saina ny hamolavola politika nasionaly ho an'ny trano fonenana ny tomponandraikitra eo anivon’ny sampan-drahrahan’ny fananan-tany. Tsara fa tara hoy ny mpanara-baovao amin'izao andro iraisam-pirenena amin'ny trano fonenana izao.

Amin'izao ankatoky ny fampielezan-kevitra izao, miverina ary mihamahazo vahana indray ny fanotofana tany tsy ara-dalàna eto Antananarivo renivohitra. Ohatra miharihary amin'izany ny eny amin'ny zone de recasement Ankorondrano. Manoloana izany anefa, mitazam-potsiny ary mifanilika andraikitra ny mpitondra sy ireo tomponandraikitra.