Archives mensuelles: avril 2020

Mitohy hatrany ny fizarana fanomezana hanampiana ny mponina amin’izao fotoana fihibohana hiadiana amin’ny Coronavirus izao. Ankoatry ny eny amin’ny fokontany sy EPP, misy ihany koa ireo mitety tokantrano hanatitra izany.

Niavaka ny fankalazana ny andron’ny Paska tamin’ity taona ity. Tamin’ny alalan’ny haino aman-jery sy tambazotran-tserasera no niara-niombom-bavaka ny tokantrano kristiana rehetra. Toy ny any am-piangonana ihany no niainana izany rehefa misy ny fifantohana ara-panahy sy ara-tsaina hoy ny tokantrano nanaovana fanadihadiana.

Nijoro vavolombelona tamin’ny tambazotran-tserasera ireo malagasy mipetraka any ampitan-dranomasina sitran’ny valan’aretina Covid-19. Fanafody fahita anivon’ny toeram-pivarotam-panafody mahazatra, zava-maniry sy ny marohafa fahitana eto Madagasikara avokoa amin’ny ankapobeny no voalaza fa nahasitrana azy ireo.

Niverina amin’ny laoniny ny famatsiam-bary manerana ny tsena kely eto Antananarivo taorian’ny TSINJO HO AN’NY MPANJIFA napetraky ny minisiteran’ny varotra sy ny indostria. Tokony hamafisina hatrany ny hetsika hisian’ny entana tsy tapaka anivon’ny tsena maro hoy ny mpaninjara.

Fanampiana maro avy amin’ny filohan’ny repoblika sy ireo malala Tanana no miparitaka manerana an’I Madagasikara manoloana ny ny fotoanan’ny fihibohona entina misoroka ny fipariahan’ny valanaretina coronavirus. Fanampiana izay miantefa indrindra any amin’ireo olona sahirana ary hisitraka izany ny rehetra na eo aza ny dingana tsy maintsy arahina raha ny fanazavana.

Velon-taraina ireo manao fitateram-bahoaka amin’ny zotra nasionaly sy rezionaly any amin’ny faritra Analanjorofo. Antony, nanantanteraka tao anatin’ny 10 andro mahery ny fihobohana izy ireo ary nampiato ny zotra rehetra.

Mbola hita eny amin’ny mpanamboatra fahitalavitra ireo fahitalavitra efa tranainy saingy vitsy. Vitan’ireo mpanamboatra ny mamelona izy ireny indray ary miankina betsaka amin’ny fisian’ny piesy maromaro akambana izany.

Miteraka kolikoly amin’ny endriny maro samihafa ny toe-draharaha ankehitriny raha ny nambaran’ny tomponandraikitra eo anivon’ny Association des Camionneurs transporteur. Misy amin’ireo mpitandron’ny filaminana no manivana ny entana afaka miditra eto Antananarivo na efa mazava aza ny nambaran’ny Filohampirenena.

Miato tanteraka ny asan’ny agences de voyages tao anatin’ny 1 volana izay. Mikorontana ny tontolon’ny fizahantany. Manoloana izany indrindra , manao antso avo ny fikambanan’ny agence de voyages eto Madagasikara ny amin’ny fanajan’ny rehetra ny fepetran’ny fihibohona ahafahana manarina aingana ny zava-misy ara-toekarena ankehitriny.

Tafapetraky ny minisiteran’ny indostria sy ny varotra ny laharana maitso 812 hanamafisana ny ady amin’ny fanararaotana ara-barotra eto Madagasikara. Azon’ny rehetra atao arak’izany ny miantso mivantana ny laharana raha misy endrika tsy fanarahan-dalàna. Mandray ny andraikiny ny minisitera aorian’izay ka miafara amin’ny fanakatonana ny tsena miampy fampandoavana lamandy hatramin’ny 50 Tapitrisa Ariary ny sazy ho an’izay tsy manara-dalàna.