Archives quotidiennes: 30 juin 2020
Zandarimariam-pirenena : tazomina 24 ora ireo tratra tsy mitondra aro-tava
Aorian’ny asa ho an’ny daholobe na ny « travaux d’intérêt généraux» hampanaovina ireo tsy mitondra aro-tava sy tsy manaja ireo fepetra ara-pahasalamana, ho tazomina 24 ora izy ireo ary raha mbola mitohy dia helafa eny amin’ny fitsarana hoy ny eo anivon’ny Zandarimariam-pirenena. Ankoatra ireo, hisy ihany koa ny fidinana any anelakelan-trano fa tsy hijanona eny amin’ny arabe intsony ny fanaraha-maso hatao.
CENI : rahampitso no hifidy ny solontenany ny solombavambahoaka
Rahampitso no hiroso amin’ny fifidianana izay ho solontenan’ny Antenimierampirenena eny anivon’ny CENI ny solombavambahoaka. Hisolo ny toeran’ny filoha lefitry ny CENI avy hatrany izay ho voafidy eo ary hanapitra ny fepotoam-piasana ny volana oktobra 2021. Hameno ny mpikambana 9 mandrafitra ny kaomiseram-pifidianana nasionaly mampiodina ny CENI izay ho voafidy eo, hirosoana amin’ny fanomanana ny fifidianana manaraka.
Befelatanana : tsy ampy ny mpitsabo misahana ny fakana singa momba ny Covid-19
90 hatramin’ny 100 isan’andro ny olona hakana singa na hanaovana Prélèvement momba ny Covid-19 etsy Befelatanana. 4 isan’andro ankilany ny mpitsabo misahana izany ka mampitarazoka ny fandraisana an-tanana ireo olona tonga eny an-toerana.
CNIDH : « tokony hojeren’ny fitsarana manokana ny famonjana ireo voaheloka »
Tokony hojeren’ny fitsarana manokana ny mahakasika ny fampidirana am-ponja vonjimaika ireo olona nanao heloka hoy ny teo anivn’ny CNIDH androany manoloana ny fahafenoan’ny fonja eto Madagasikara amin’izao fotoana izao. Tsy tokony hampitarazoka ny fitsarana ihany koa ireo mpitsara mba tsy hampifangaro ireo meloka sy ireo miandry fitsarana mba hampanajana ny zon’olombelona raha ny fanazavana hatrany.
Kaominina 20 : nisitraka ny drafitra fanajariana ny tany (SAC)
Kaominina 20 eto amin’ny faritra Analamanga no nisitraka drafi-panajariana kaominaly na ny schémas d’aménagement Communal androany. Tamin’ny alalan’ny ministeran’ny fanajariana ny tany sy ny asa vaventy, ny ministeran’ny tontolo iainana amin’ny alalan’ny GIZ, eo ihany koa ny mpiaram’iombon’antoka samihafa no nahafahana nanatontosa izany. Ity farany izay zava-dehibe amin’ny fampandrosoana ny kaominina anatin’ny ady manoloana ny fiovaovan’ny toetry ny andro.
« Vary mainty » : efa misy eto Madagasikara
Efa misy mamboly eto Madagasikara ny karazam-bary antsoina hoe « vary mainty » izay miavaka eo amin’ny lokony sy ny tsirony. Ao amin’ny faritra Vakinankaratra no ahitana fambolena azy hatreto izay manomboka mivelatra tsikelikely. Ity kazaram-bary ity izay miavaka eo amin’ny fofony sy ny lokony.