Archives mensuelles: juillet 2020

Entina aminao ao anatin’ny fanadihadiana manaraka kosa indray ny mikasika ireo famatsiam-bola izay mbola andrasan’i Madagasikara. Raha ny antontanisa nivoitra tao anatin’ny tatitra navoakan’ny minisiteran’ny tetibola sy ny vola, mitentina 466.7 tapitrisa dolara izany.

Mahazo laka eo amin’ny fitaterana entana eto Madagasikara ankehitriny ireo fiara sprinter izay nitondra olona teo aloha. Miantso ny minisitera tomponandraikitra ny Association des Transporteurs Camionneur manoloana ireo sprinter aman-jatony mitondra entana.

Nisy karazana varika na Lémurien vaovao hita teto Madagasikara, izay karazany faha-113. Tamin’ny alalan’ny fikarohana notontosaina siantifika 27, iray amin’ireo teratany Malagasy, no nahitana izany. « Tsiditsidy » no anarany, ary « Microcebus Johani » no anarana siantifika iantsona azy. Ankoatra izay, navoakan’ny Futura Planète izay tranokala miompana amin’ny siansa sy fikarohana tamin’ity herinandro ity, fa misy fossile mitovy fianakaviana amin’ny Dinosaure ihany koa hita teto Magakasikara.

Mitohy hatrany ny fanoheran’ny mponina ny fitsanganan’ny Pylone lehibe iray ao Antsahatsiresy, kaominina Sabotsy Namehana. Tonga nijery ny zava-misy teny antoerana androany ny solombavambahoakan’Avaradrano. Ity farany izay nanamafy fa tsy azo ekena ny fipetrahan’izany anaty tanàna toy izao. Ny didim-pitsarana no hamaritra ny fiverenan’ny asa na tsia hoy ny tomponandraikitra misahana ny fanatontosana ny asa.

Manodidina ny 220 ny mitondra ny tsimok’aretina Coronavirus eo anivon’ny fianakaviamben’ny zandarimariam-pirenena, araka ny tatitra avy amin’ny sekreteram-panjakana miadidy ny zandarimariam-pirenena androany. Voakasik’izay ihany koa ny teny anivon’ny sekoly ambony momba ny fampiofanana zandary any Ambositra sy Moramanga izay nahitana tranga 467.

Tsy misy tombony ho an’ireo toeram-pisakafoana ny fisokafana hatramin’ny 1 ora atoandro. Izay raha ny nambaran’ny avy eo anivon’ny FHORM Fédération des Hôteliers et Restaurateurs de Madagascar. Etsy ankilany, miisa 3 mzava tsara ny fanampiana angatahan’izy ireo amin’ny fanjakana , isan’izany ny fanemorana na ny fanafoanana ny hetra ny taona 2020.

Nahitana fahatapahan-jiro matetika tao amin’ny renivohitra Vakinankaratra ny herinandro lasa teo.  Anton’izany ny fahatapahan’ny tamban-jotra izay mampifandray an’Antsirabe sy Antananarivo raha ny  fanazavana  avy eo anivon’ny orinasa JIRAMA.

Nanolotra fanampiana sy fitaovana ho an’ny CHU Tanambao I ao Antsiranana ihany koa ny filoham-pirenena sy ny vadiny taorian’ny tao Mahajanga sy Nosy Be. Tsy maintsy ho resintiksa ny Valan’aretina hoy ny filoha ka irariana tsy hisy intsony ireo mamoy ny ainy vokatr’izany. Ankoatra izay, nomena indemnité sy Prime de risque ihany koa ireo mpitsabo sy mpiasan’ny fahasalamana mandray an-tanana ireo mararin’ny Coronavirus.

Manodidina ny 10 000 ny isan’ny olona nampanaovina asa ho an’ny daholoba nandritra izao fihibohana izao raha ny tatitra navoakan’ny minisiteran’ny filaminam-bahoaka. Ho an’ny mpandinika ny fiarahamonina, tokony ovaina ny fomba fanentanana ny olom-pirenena mba ahatsapa tena amin’ity ady iombonana ity.

Taorian’ny fifampiresahana teo anivon’ny roa tonta azo ambara fa niravona ilay raharaha mahakasika ny fikasian-tanana sy fandratrana nataona miaramila tamina sivily 62 taona tao amin'ny Fokontany Mangarivotra Avaratra. Tranga izay niseho ny marainan'ny zoma faha 17 Jolay lasa teo, io no nambaran’ny mpisolovavan’ilay mpitory taorian’ny fotoampitsarana omaly tany Toamasina.