Archives mensuelles: août 2020

Miisa 19 hatreto ireo Gadra nitsoaky ny fonja tao Farafangana mbola karohina hatramin’izao. Fampiasana Basy no resaka hoy ny eo anivon’ny Zandary, ka aleo mahita ireo nandositra ny Fonja ho lavon’ny bala toy izay ireo mpitandro filaminana, indrindra ny vahoaka izay ho tafihin’izy ireo. Ireto farany izay nilaza fa tokony hanadihady ireo mpiaro ny Zon’olombelona vao manao fanambarana.

Tsy hiakatra ny saran-dalana ho an’ny zotra RN2 hisokatra manomboka ny Sabotsy izao, araka ny nambaran’ny teo anivon’ny ATT androany. Fiovana maro ihany koa no hipetraka, isan’izany ny tsy maintsy hitondran’ny mpandeha dika mitovy ny karapanondro . Raha ny fanazavana, efa maro no mpandeha nanao famandrian-toerana.

Teratany Malagasy miisa 7 no nogadraina ao amin’ny fonjan’i Mohéli Comores nanomboka ny volana Jona lasa teo hatramin’izao. Hatreto, tsy fantatra mazava ny antony hitanana azy 7 mirahalahy am-ponja, ary miova hatrany ny vesatra hanenjehana azy ireo.

Andro voalohany iverenan’ny fiara fitateram-bahoaka eto an-drenivohitra sy ny manodidina. Na teoa za ireo vitsivitsy tsy nanaja ny fepetra napetraka, amin’ny ankapobeny, niezaka nanaja izany avokoa ny maro. Tsy nisy ny fiakaran’ny saran-dalana ary hita tany anatin’ny fiara avokoa ny fitaovana rehetra entina miady amin’ny fipariahan’ny valanaretina Covid-19.

Hazo sarobidy toy ny « palissandre » miisa 281 sy karazan-kazo hafa miisa 293 no saron’ny Sampandraharaha miady amin’ny kolikoly eo anivon’ny minisiteran’ny tontolo iainana sy ny fandrosoana lovain-jafy andro vitsy lasa izay teny Bongatsara amin’ny lalampirenena faha-7. Nosamborina ny tompon’ireo hazo sy ireo mpamily ary anaovana fanadihadiana lalina ankehitriny.

Nanomboka androany ary haharitra 12 andro ny fotoam-pivoriana tsy ara-potoana atrehin’ny Antenimiera roa tonta araka ny fampiantsoan’ny governemanta azy ireo. Ny volavolan-dalàna laharana 001-2020 no isany lahadinika amin’izany ka hananganana ny « Commission Mixte Paritaire».

Maherin’ny 300 no efa nanjifa tapakila na billet d’avion teo amin’ny kaompaniam-pitaterana Tsaradia tao anatin’ny 2 andro, taorian’ny nanambaran’ny Filohan’ny Reboblika ny fisokafan’ny sidina anatiny. Na efa dingana lehibe ho an’ny toekarena aza ny fisokafany, vinavinain’ny eo anivon’ny Tsaradia fa afaka 2 taona any ho any vao hiverina amin’ny laoniny ny sehatry ny fitaterana an’habakabaka eto amintsika. Amin’izao fotoana izao, miverina manazatra mpanjifa ireto farany.

Miverina ny filaharana etsy amin’ny Centre Médical Covid 19 Andohotapenaka io maraina io. Raha ny fanadihadiana natao teny an-toerana, ireo olona ahitana soritr’aretina sy alefan’ny mpampiasa amin’ny ankapobeny ireo olona tonga milahatra.

Amin’ny alalan’ny antso antaribihy no ahafahana mamandri-toerana raha toa ka handeha amin’ireo zotra izay hisokatra manomboka ny Sabotsy ho avy izao. Efa misy raha ny fanazavana ny lamina samihafa manaja ny fepetra ara-pahasalamana amin’ny fanantontosaina izany. Etsy ankilany, nisy nandritra ireny fotoanan’ny fihibohana ireny ny fandehanana an-tsokosoko miditra eto Antananarivo raha ny fanadihadiana.

Manodidina ny 250 isan’andro ny fiara tsirihana eny amin’ny toeram-pirihina fiara eny Ivato amin’izao. 1 andro tsy iverenan’ny fiara fitateram-bahoaka , ireto farany no mamaritra ny 90%n’ny fiara tsirihana.