Archives annuelles: 2020

Nanao hetsika hitakiana sy hanampiana ireo mpiasa amin’ny sehatra tsy miankina sy ireo mpiasa miasa ho an’ny fanjakana ECD nandritra iny hamehana ara-pahasalamana iny ny Randrana Sendikaly. Androany no namehezana ny atrik’asa natao izay nandritra ny telo andro niarahana tamin’ny CNAPS.

Tsizarizary ny trano fianarana ao amin’ny Lycée Ampasimbe Manantsatrana, Fenerive-Est. Ahiana hiteraka fihatohan’ny fampianarana any an-toerana ny fotoam-pahavaratra ho avy noho izay. Manao antso avo ny hananganana fotodrafitr’asa manara-penitra any an-toerana manoloana io ireo tomponandraikitra any an-toerana.

Entina mampiroborobo ny fizahantany anatiny, miditra amin’ny fampiasana ny package izay natokana teo aloha ho an’ny mpizahantany vahiny ireo mpikarakara dia. Manomboka amin’ny 350000 ar ny vidin’izany isan’olona raha ny fanadihadiana natao. 

Notontosaina androany ny fihaonana an-databatra boribory niresahana momba ny PNDU na ny politique de développement urbain, niarahana tamin’ny ministeran’ny fanajariana ny tany sy ny asa vaventy sy ireo mpiara-miombon’antoka PTF na ny Partenaires Techniques Financiers. Zava-dehibe ho an’ny fampandrosoana ny tanàn-dehibe ny fiaraha-manantontosa ity programan’asa ity, ary naneho ny fahavononany amin’izany ireo PTF.

Tafiakatra 475 hatramin’ny androany ny antontan-taratasin’ady fandravana didim-pitsarana mahakasika ny fifidianana kaominaly tonga teny anivon’ny filankevi-panjakana. Efa namoahana didim-pitsarana avokoa ny 69 %. Tsy maintsy ho faranana ny faha-11 novambra arak’izany ny 31 ho fanatsarana ny lisi-pifidianan’ny mpifidy vaventy.

Misy manozongozona ny hanala amin’ny toerany ireo mpikambana ao anatin'ny Birao maharitry ny Antenimierampirenena amin'izao fotoana izao. Ankilany, tsy mbola nisy fanangonan-tsonia mahakasika izany raha ny nambaran'ny Filoha lefitra androany. Mbola eo ampandinihana mahakasika ilay resaka fisotroan-dronona ankilany ny bé sy ny maro eo anivon’ity andrim-panjakana ity.

Ny faha 14 ny volana Novambra ho avy izao no hivaly ny fanadinam-panjakana Baccalauréat hoy ny minisitra tompon’andraikitra androany. Hisy kosa raha ny fanazavana ny fanaovana tatitra amin’ny fomba ofisialy ny isan’ireo tsy nanatrika fanadinana sy tsy maintsy nijanona noho ny antony maro samihafa ary indrindra ireo nanao hosoka na Fraude nandritra ny fiatrehana ny fanadinana.

Nihotsaka ny rihana faha-2 tao amin’ny biraon’ny Office National des Arts et de la Culture teny amin’ny arcade Analakely ny antoandro teo. Vokany olona 5 no naratra ary tsy maintsy noravana ny ampahan’ny rindrindra hisorohana ny loza mety hitranga indray. Ialana tsiny amin’izay mety ho tohina amin’ny sary

Mbola sakana amin’ny fandraharaha ara-barotra indrindra ny atao amin’ny vondrom-barotra rejionaly ny mahakasika ny BNT na ny BARRIERE NON TARIFIAIRE. Vitsy ankilany ny mpandraharaha mahafantatra ny karazana sakana ara-barotra mianjady azy ka tsy ahafahana mandray ny fepetra mifandraika amin’izany. Hamafisina ny fampahafantarana momba izany araka ny nivoitra nandritra ny atrikasa niarahana tamin’ny minisiteran’ny varotra sy ny indostria.

Nivaona tamin’ny fanamby napetraka ny fitantanan’ny kaominina sy ny fikambanana isan-tokony ny fotodrafitrasam-pamatsian-drano teny ifotony hatrizay. Tsy tafapetrak’izy ireo araka ny tokony ho izy ny maha-sehatra mampidi-bola na SECTEUR PRODUCTIF ny fitantanana ny rano. Hitodika betsaka amin’ny tsy miankina ny minisitera tomponandraikitra manombok’izao ka hojerena avokoa na ny fampiasam-bola na ny fitantanana ny fotodrafitrasam-pamatsian-drano.